உபுண்டு9.04இல் இணைய இணைப்பைப் பெறுவது எப்படி?

TamilFOSS » லினக்ஸ் (GNU/Linux) » உபுண்டு

உபுண்டு9.04இல் இணைய இணைப்பைப் பெறுவது எப்படி?

(4 posts) (2 voices)

Tags:

tha.uzhavan
Member

இன்றே இத்தளத்தில், இரவியால்(தமிழ் விக்கிப்பீடியா அதிகாரி) இணைகிறேன். நான் தமிழகத்தில், சேலம் மாவட்டத்தில் வசிக்கிறேன். தமிழ் (விக்சனரியில்)அகரமுதலியியலில் ஆர்வமுடையவன். நான் உபுண்டு 9.04 நிறுவியுள்ளேன். இதில் இணைய இணைப்பை ஏற்படுத்துவது எப்படி? இந்த ip எண்களை
192.168.192.42 கொடுக்கும் போது வின்டோசு-எக்சுபி யில் எடுக்கிறது. உபுண்டுவில் இணைய இணைப்பைப் பெறுவது எப்படி?

இந்த இணைய இணைப்பானது வீட்டின் மேலே ஒரு அலைவாங்கியின் மூலம் பெற்று, அதனை ஒரு இணையமின்வடம் மூலம் கணினியுடன் இணைக்கின்றனர். அலைமாற்றி (modem) எதுவும் இல்லை. கணினியுடன் இணைத்து விட்டு, பின்வரும் விவரங்களைக் கொடுத்தவுடன், இணைய இணைப்பு (வின்டோசில்-எக்சுபி) கிடைக்கிறது.

மேலும் சில விவரங்கள் (TCP/IP properties): subnet mask:255.255.255.0 - default gateway:192.168.192.1 - preferred DNS server:202.56.250.6 - alternate DNS server:202.89.66.2

10தினங்களாக அடிப்படைத் தெரியாததால், சிரமப் படுகிறேன். விளக்கங்களை எதிர் பார்த்து முடிக்கும், த*உழவன். வணக்கம்.

Posted 6 months ago #
tha.uzhavan
Member

கணினி பயன்பாடு இல்லாமலே, அன்றாட வாழ்வு மலரும் சூழலில் வாழும் எனக்கு, எல்லாமே சிறந்த அனுபவம் தான். அனுபவத்தை விட சிறந்த ஆசான் இருக்க முடியாது. எனினும், அந்த அனுபவம் கிட்டுவதற்கு, சில சங்கடங்களைத் தாண்ட வேண்டியுள்ளது.

'கற்றலின் கேட்டல் நன்று' என்பது தமிழ் முதுமொழி. அம்மொழிக்கு ஏற்ப, எனது அனுபவங்கள் பிறருக்கு பயன்படலாம்.

தரம் நிறைந்த உபுண்டு இறுவட்டினை, தற்காலிக (live CD) முறையில் பயன்படுத்தி பார்க்க வேண்டும். பின்பு, நிரந்தராமாக நம் கணினியில், போதுமான இடஒதுக்கீடுகளுடன் நிறுவ வேண்டும்.

தானாக இணைய இணைப்பு ஏற்படவில்லையென்றால், பின்வரும் முறையில் நாமாக இணைய இணைப்பை ஏற்படுத்தலாம்.

ubundu(9.04) System--> Preferences--> Network Connections --> wired -->Auto eth0 தெரிவு செய்து edit என்பதைச் சொடுக்கவும். தோன்றும் பதிகையில், கடவுச்சொற்களைக் கொண்டு கடந்தால், பல தத்தல்(tab)களுள்ள சாளரம் தோன்றும். Connection name என்பதில், Auto eth0 என்பது இருக்கணும். இரண்டாவதாக, Connect automatically என்பதைக் குறியிட்டு, தேர்ந்தெடுக்க வேண்டும்.

அதில் IPv4 என்பதைத் தெரிவு செய்யணும். அதிலுள்ள methodஎன்பதில், manual என்பதைத் தேர்ந்தெடுக்க வேண்டும்.பின்பு,Address என்பதற்குக் கீழேச் சொடுக்கித் தோன்றும் கட்டத்தில் அதற்குரிய ipஎண்களைக் கொடுக்க வேண்டும். அதைப்போலவே, Netmask, Gateway போன்றவற்றிற்க்கும், அதற்குரிய எண்களைக் கொடுக்க வேண்டும்.

கடைசியாக DNS servers என்ற கட்டத்தில் இரண்டு(202.56.250.6, 202.89.66.2) எண்தொகுதிகளையும், அடுத்தடுத்து commaகுறியீடு கொடுத்து இட வேண்டும். இறுதியாக, Applyஎன்பதைச் சொடுக்கி முடிக்க வேண்டும்.

வின்டோசின் Runஎன்பதில், cmd என்று கொடுத்தால் தோன்றும் சாளரத்தில், ipconfigகொடுத்தால் இந்த எண்கள் அனைத்தையும் கண்டறிய முடியும்.

அப்புறம் என்ன கொண்டாட்டம் தான். பல அன்பருடனும், நண்பருடனும் இனிய இணைய இணைவுகள் தான்.

Posted 5 months ago #
கா. சேது | K. Sethu
Administrator

அன்பின்குரிய த. உழவன்,

தங்களுக்கு ஏற்பட்டத் தடங்குலுக்குத் தாங்களாகவே முயன்று தவறி மேலும் முயலல் வழியாக சரியானத் தீர்வைக் கண்டறிந்து கற்றதையும் பிறர் பயனுக்காக தாங்கள் முன்வைத்துள்ளதையும் கண்டு நான் மிகவும் மகிழ்ச்சி அடைவதுடன் தங்களுக்கு எனது பாராட்டுகளையும் தெரிவிக்கின்றேன்.

இம் மன்றத்தில் வேறு சில இழைகளில் என்னால் முன்வைக்க வேண்டிய பல வழிகாட்டல்கள் மற்றும் தெளிவாக்கஙள் ஆகியனவற்றை எழுதுவதற்குக் கடந்த இரு மாதங்களாக நான் விரும்பும் அளவிற்கு நேரம் ஒதுக்க இயலாமல் இருந்து வந்துள்ளது. விரைவில் அவற்றை நிறைவேற்றுவேன் என்பதே எனது ஆவலும் எதிர்பார்ப்பும்.

நேற்று காலை தங்கள் பதிவைக் கண்டு வழிகாட்டுவதற்காக உபுண்டு -9.04 (யோண்டி) நிகழ்வட்டு இயக்கத்தில் திரைக்காட்சிகள் ஆக்கி எனது http://sites.google.com/site/skhome/scrnshots/ubuntu-jaunty-nw_mgr-applet வலைப்பக்கத்தில் பதிவேற்றி உள்ளேன். தங்களுக்கு மட்டுமல்லாமல் இத்தகைய பிரச்சினை சந்திக்கும் ஏனைய பயனர்களுக்கும் உதவக் கூடியதாக 3 வகை அமைப்புக்களைப் பற்றி எழுதும் நோக்கத்துடன் அவற்றை ஆக்கி உள்ளேன். (அம் 3 முறைகளில் 3 வதே தாங்கள் கண்ட தீர்வு.) கூடிய விரைவில் ஓய்வு நேரங்களில் அவ் வழிகாட்டலை அடுத்த பதிவாக எழுதுவுள்ளேன். தற்போதைக்கு தங்களது சில குறிப்புகளுக்கு எனது விளக்கங்கள்.

1. //Connection name என்பதில், Auto eth0 என்பது இருக்கணும். //

அவ்விடத்தில் பயனர் விரும்பினால் Auto eth0 எனவுள்ள அப்பெயரை மாற்றவும் இயலும். Auto eth0 முன்னிருப்பு இயல்பாக அமைந்துள்ள பெயர். ஒருக்கால் பயனர் அவ்விணைப்பை முதலில் அகற்றி விட்டு புதிதாக ஒரு இணைப்பை சேர்திருப்பார் எனில் அதற்கு முன்னிருப்பு இயல்பான பெயர் "Wired connenction1" என இருக்கும் என நினைவில் உள்ளது.

2. //இரண்டாவதாக, Connect automatically என்பதைக் குறியிட்டு, தேர்ந்தெடுக்க வேண்டும்.//

மேலும் கணினியில் ஒன்றுக்கு மேற்பட்ட பயனர் கணக்குகள் ஆக்கப்பட்டு பயன்படுத்தப்படுவதானால் உரையாடல் பெட்டகத்தின் கீழே"Available to all users" என்பதும் தேர்ந்தெடுக்கப் பட்டிருக்க வேண்டும்.

3. //கடைசியாக DNS servers என்ற கட்டத்தில் இரண்டு(202.56.250.6, 202.89.66.2) எண்தொகுதிகளையும், அடுத்தடுத்து commaகுறியீடு கொடுத்து இட வேண்டும்.//

ஆம் எனது http://sites.google.com/site/skhome/scrnshots/ubuntu-jaunty-nw_mgr-applet/Nw-Mgr-6.png திரைக்காட்சியில் போல பயனரது இணையச் சேவைக்கான DNS வழங்கிகளின் ஐ.பி. எண்கள். முக்கியமாக comma குறியீடு அடுத்து ஒரு இடைவெளி (spacebar) விட்டே அடுத்த எண் இட வேண்டும்.

4. // வின்டோசின் Runஎன்பதில், cmd என்று கொடுத்தால் தோன்றும் சாளரத்தில், ipconfigகொடுத்தால் இந்த எண்கள் அனைத்தையும் கண்டறிய முடியும்.//

லினக்சில் முனையத்தில் ifconfig என்ற கட்டளை ஒரு வகையில் அது போன்றது. அதில் DNS வழங்கிகளின் தகவல்கள் இரா.

ஆனால் எனது http://sites.google.com/site/skhome/scrnshots/ubuntu-jaunty-nw_mgr-applet/Nw-Mgr-2.png திரைக்காட்சியில் காட்டியவாறு Network Manager Applet க்கான பலகத்தில் உள்ள ஓவத்தில் (icon) சுட்டியின் வலது விசை சொடுக்கினால் தென்படும் "Connection information" கட்டளையை இயக்கினால் http://sites.google.com/site/skhome/scrnshots/ubuntu-jaunty-nw_mgr-applet/Nw-Mgr-7.png இல் போல DNS தகவல்களும் வரும். இது வெற்றிகரமாக தொடர்பு ஏற்படுத்தப் பட்ட பின்னரே இயக்கப்படக் கூடியது.

மேலும் முதன் முறை அமைப்புகள் ஆக்கமாயினும் அல்லது பின்னர் உள்ள அமைப்புகளில் மாற்றங்கள் செய்விப்பினும் அத்தகைய திருத்தங்கள் இட்ட பின் http://sites.google.com/site/skhome/scrnshots/ubuntu-jaunty-nw_mgr-applet/Nw-Mgr-2.png இல் உள்ளவாறு தென்படும் Enable Networking தேர்வை ஒரு தடவை அகற்றி இணைப்பைத் துண்டித்து மீண்டும் அத் தேர்வைக் குறியிட்டு இணைப்பைப் புதுப்பிக்க வேண்டும் (ஆனால் உடனடியாக அமர்வில் இருந்து விலகி மீண்டும் புகுபதிகை செய்வின் அவ்வாறு செய்யத்தேவை இல்லை).

ஏற்கனவே நான் எழுத எண்ணியிருந்தவாறு இத்தகையக் மின்கம்பிவழி இணைப்புகளுக்கான மூவகை அமைப்புக்களைப் பற்றி பின்னர் எழுதுவேன்.

~சேது

Posted 5 months ago #
tha.uzhavan
Member

தங்களது உயர்வான, அரிதான நேரத்தினை எனக்காகவும் செலவிட்டமைக்கு, மிக்க நன்றி. நான் கணினியைத் தொட்டே ஏறத்தாழ 3 வருடங்கள் தான் ஆகிறது. தொடர்ந்து பயன் படுத்துவதற்கு பலர் காரணம். அதில் இரவி முக்கியமானவர். சோதனை அடிப்படையிலேயே, எனது கணினித் தேவைகளைப் பூர்த்தி செய்கிறேன். தங்களைப் போன்று முறையாக பதில் எழுத இயலாததற்கு இதுவே காரணம். என்னால் ஏதேனும் பிழைகள் இருப்பின், அதனை எப்போது வேண்டுமானாலும் நீக்கி விடுங்கள்.

தங்களது திரைக்காட்சிகள் கண்டேன். என்னைப் போன்ற கற்கத் துவங்குபவருக்கு இது போன்ற காட்சிகளே, நல் ஆசான். தொடர்ந்து (நேரம் கிடைக்கும் போது) இது போன்ற அடிப்படைக்களில் கவனம் செலுத்தினால், பலரும் உபுண்டுவை பயன்படுத்துவர் என்பது என் எண்ணம். இங்கு 'தெரியாது' என்று தெரிந்து கொள்ள பிறரை அணுகினால், கையிலிருக்கும் பணத்தைக் கரைத்து விடுகின்றனர்.

படங்களை இணைத்து கேள்விகளோ அல்லது அதற்குரிய பதில்களோ தரும் வசதி இங்கு இருந்தால் நன்றாக இருக்கும். அது ஒரு குறையாக நினைக்கிறேன். நன்றி. வணக்கம்

Posted 5 months ago #

RSS feed for this topic

Reply

You must log in to post.